خطاب العمل Hr Latterهو إثبات رسمي يتم استخراجه من الجهه اللى بتعمل فيها لتقديمه للسفاره كاثبات انك موظف بتشتغل فى المكان الفلانى و بتشغل الوظيفه الفلانيه بالمرتب المحدد حتى تاريخه, ويعتبرمن اهم المستندات الي بتقدمها للسفارة علشان تثبت ان عندك وظيفة ومصدر دخل شهري ثابت, والهدف منه حاجتين :
الاولى انه اثبات انك عندك وظيفه ومرتب ثابت وبالتالى اثبات انك هترجع تانى ومش هتكسر الفيزا .
الثانيه انه توضيح لمرتبك ووضعك المالى وانك قادر على المتطلبات الماديه .
ايه صيغة خطاب العمل أو الHR Letter اللي أقدمها للسفارة؟ السؤال ده جالنا كتير جدا على رسائل صفحتنا على فيسبوك , وفي عملاء كتير خايفين يكونوا ناسيين نقطة لازم تتقال في خطاب العمل وعايزين يتأكدوا, عشان كدة المقالة دي بنشرح فيها أهم النقاط اللي لازم تتوفر فى خطاب العمل عشان يكون مقبول وانت بتقدم فى اى سفاره.
1/ أول حاجه كتير من االعملاء بيهملوها وللاسف ممكن السفاره ترفض خطاب العمل بسببها, رغم بساطتها جدا, هى ان الاسم المكتوب في خطاب العمل لا يكون مطابق تماما للاسم فى جواز السفر المقدم للسفاره, على سبيل المثال اذا كان هناك اى اسم يحتوى على (ال) زى “الخطيب” او “المعتصم” بيكون غالبا مكتوب فى جواز السفر كلمه واحده بدون اى مسافات, زى “ELKHATIB” او “ELMOATASEM” فلازم يكون مكتوب فى خطاب العمل بنفس الطريقه بدون مسافات او شرط , فبلاش يكون “EL KHATIB” او “EL-MOATASEM” لان السفاره وقتها بتعتبرهم شخصين مختلفين, نفس الشئ للاسماء اللى بتحتوى على كلمه “عبد”, زى “عبد الله” و “عبد الرحيم” , لو مكتوبه فى جواز السفر كلمه واحده بدون اى مسافات ويشترط تتكتب بنفس الطريقه فى خطاب العمل .
2/ تانى حاجه لازم خطاب العمل Hr Letter يكون مكتوب على ورق الشركه الرسمى , ويكون فىه letter head و footer من الشركة مسجل عليه اسم الشركه واللوجو وارقام التليفونات والعنوان ولو فى موقع الكترونى لهم او ايميل, وكمان رقم البطاقه الضريبيه والسجل التجارى ان امكن لاكتمال المصداقيه قدام السفاره وانها مش ورقه مضروبه او شركه وهميه – وطبعا لازم يكون مختوم بختم الخاص بالشركة وبأمضاء المسئول.
3/ أهم البيانات اللى لازم تتكتب فى HR Letter بعد م اتكلمنا عن ان الاسم يكون مطابق لجواز السفر, هى :
– انه يكون موجه للسفاره اللى انت هتقدم فيها, وده افضل من مجرد ذكر جمله “الى من يهمه الامر”.
– تحديد المسمى الوظيفى التى تعمل بها فى الشركه.
– تاريخ التوظيف ( يعمل من تاريخ كذا حتى الان )
– المرتب الشهري
– الرقم التأمينى (مع ارفاق شهاده التأمينات الاجتماعية)
– اخر حاجه وللاسف فى كتير من العملاء بينسوها في حالات السفر للسياحة هى ان لازم تذكر تاريخ السفر المتوقع وأهم حاجه الموافقه من الشركه على منحك هذه الاجازه فى المده المتوقعه للسفر وانك راجع تكمل شغلك بعد ما تخلص رحلتك, اما فى حالات السفر للهجره فبيتم تحديد سنوات الخبره وبعض البيانات عن الشركه مثل رقم السجل تجاري والبطاقه الضريبيه الخاص بهم للتأكد من صحه وجود الشركه كنشاط التجارى.
الحالات الخاصه
1/ اصحاب الشركات والاعمال الخاصة: طبعا لا يتم تقديم خطاب عمل او HR Letter لاصحاب الشركات والاعمال الخاصه و يستبدل بتقديم السجل التجاري، والبطاقة الضريبية، وميزانيه الشركة مختومة من مراجع قانوني لاثبات وجود شركة حقيقية قائمة بالفعل وليست وهميه . كل هذه المستندات يجب ان تقدم للسفارة مترجمة فى مكتب ترجمة معتمدة .
2/ أما بالنسبه لمن يعمل بشكل حر أو Free Lancer
من مزايا العمل الحر او Free Lancer بالرغم من عدم وجود وظيفة رسميا ودخل ثابت, هي انك ممكن تشتغل من اي مكان في العالم. وبالتالى غير مقيد بفترة اجازه من العمل وعشان كده ممكن تاخد فيزا شهر او ثلاث شهور او اكثر كمان.
ولكن توجد مشكله واحده, فكما ذكرنا ان الهدف من خطاب العمل هو اثبات ان عندك وظيفة ومصدر دخل وقادر ماديا على الانفاق فى رحلتك، وكمان عشان تثبت انك مش عاطل ولا تنوي الهجرة الغير شرعية وكسر الفيزا والبحث عن اى عمل هناك فى مهن بسيطه. عشان تحل الموضوع ده فى بعض الاقتراحات اللى ممكن تساعدك :
– أفضل الحلول انك تحاول تعمل نشاط تجارى كمهن حره لتقديم خدماتك, وتعمل سجل تجاري وبطاقة ضريبية، حتى لو النشاط التجارى ده على الورق بعنوان بيتك او انك تأجر اى مكان بسيط بمبلغ قليل كأثبات للجديه تطلع عليه ورق السجل التجارى والبطاقه الضريبيه. وتكون جميع معاملاتك مع العملاء (حساب بنكى , تعاقدات, تحويلات ماليه ) رسميا من خلال النشاط التجارى ده , وتتحول من Free Lancer لصاحب نشاط تجارى.
– لو صعب تطبق الاقتراح السابق يبقي على الاقل حاول تخلى جميع تعاملاتك مع عملائك من خلال تحويلات بنكيه على حساب بنك محدد, ولو فى تحصيل مبالغ مالية كاش من عملائك اعمل بيها ايداع بنفسك فى حسابك البنكى قبل ما تصرف منهم – ده هيخلى كشف الحساب فيه حركه ايداعات وسحب كتيره وهيوضح موقفك المالى فى السفاره وقدرتك على الانفاق فى الرحله وانك مش عاطل بتحاول تهرب من البلد. لو عايز تعرف اكتر عن كشف الحساب البنكى وأهم 3 شروط لازم تتوافر فيه اضغط هنا
– حاول تعمل عقد مبدئي لتقديم خدمات مع كل عميل يطلب خدماتك (فى نماذج لعقود تقديم خدمات كتيره على جوجل تقدر تختار منها اللى يناسبك) ، وتكون بأمضاء الطرفين, ولو أمكن صحة التوقيع من البنك يكون افضل لان البنك هيختم عليها وهتكون مقبوله ومقنعه فى السفارة.
3/ اما لطلبه الجامعات :
1/ يتم تقدم جميع الاوراق اللى بتثبت الالتحاق بالجامعه , وايصال دفع المصاريف عشان تثبت للسفاره انك هترجع تانى عشان تكمل دراستك.
2/ اثبات القدره الماليه على الانفاق على الرحله وده بيتم من خلال تقديم مستندات خاصه بالوالدين, لو موظفين بيبقي خطاب عمل يوضح مرتبهم ولو اصحاب شركات بيبقي السجل التجارى والبطاقه الضريبيه.
3/ بالاضافه الى كشف حساب بنكى للوالد او الوالده او كلاهما لاخر 3 او 6 شهور حسب طلب السفاره, لاثبات الوضع المالى للسفاره.
4/ شهاده من ولى الامر او قريب درجة اولى من العائله مع اثبات صلة القرابة, مثل شهادات الميلاد لثبوت صله القرابه. ولازم كمان تقديم خطاب يفيد بموافقته على سفرك وتوضيح نيته للصرف على جميع التكاليف الخاصه بالسفر والتوقيع مع بيانات التواصل وصور جواز سفره او بطاقته الشخصيه .
ويتم تقديم جميع الاوراق المقدمه الى السفاره باللغه الانجليزيه او بلغة السفاره حسب طلبهم, مترجمة من مكتب ترجمة معتمد لديه ختم قانونى – وللاستفسار عن اسعار الترجمة او اى استفسارات أخرى يمكنكم مراسلتنا من خلال صفحتنا على فيسبوك او واتس اب 01016663329
***** هل استفدت من هذا الموضوع ؟ *****
انضم الان الى اكثر من 20 الف معجب ومتابع على فيسبوك ليصلك اشعارات بكل جديد
أهم 3 شروط يجب توافرها فى خطاب العمل Hr Letter المقدم الى السفارة
